Velkomin. Á þessari síðu eru fyrst upplýsingar um mig og svo um bækurnar mínar. Góða skemmtun!

Frá útskrift úr Leiklistarskóla Íslands árið 1991 hef ég bæði leikið, leikstýrt og skrifað fyrir leiksvið og sjónvarp. Eitt af mínum fyrstu verkum var að sjá um Stundina okkar sem höfundur, leikari og leikstjóri. Ég hef stofnað tvö sjálfstæð leikhús og leikið eða leikstýrt í öllum atvinnuleikhúsum landsins. Ég hef leikið í fjölmörgum sjónvarpsþáttum og kvikmyndum - meira að segja tveimur Bandarískum; The Secret Life of Walter Mitty og Bokeh - og er auk þess mest seldi barnabókahöfundur landsins frá árinu 2011.
 

 
GUNNAR HELGASON
Rithöfundur, leikari, leikstjóri ...

Ég fer í alla skóla sem vilja fá mig til að lesa upp og spjalla við krakkana um bækur og allt hitt. Ég er ástríðuveiðimaður, áhuga-smiður og efnilegasti knattspyrnumaður landsins. Ég tala ensku, sænsku og serbó-króatísku en get bjargað mér á dönsku, þýsku, frönsku og spænsku. Ég var einu sinni rosagóður á skíðum (fullt af medalíum og einn bikar) og er oftast hress. :)
Ég er giftur leikkonunni, leikskáldinu og leikstjóranum Björk Jakobsdóttur og við eigum tvo stráka, Ásgrím (´93) og Óla Gunnar (´99) sem verða örugglega leikarar líka.
Svo er það hundurinn Esja, hvolpurinn Grímur og hestarnir 7!

 

En ég er stundum spurður að því af hverju ég skrifa barnabækur.

 

Ég fæddist inn í mjög skemmtilega og hressa fjölskyldu. Mamma var hressasta mamman í blokkinni (Háaleitisbraut 18 – sögusvið Gogga og Grjóna) og þótt víðar væri leitað. Hún var alltaf að láta okkur krakkana gera eitthvað. Safnaði saman fullt af krökkum og lét okkur fara í leiki eða syngja. Hún spilaði á gítarinn eða píanóið þó hún segðist ekkert kunna á hljóðfæri.  Svona nett mamma klikk.

 

Ég á tvíburabróður, hann Ásmund og tvö eldri systkini, Nínu og Hallgrím. Ég deildi herbergi með Nínu (Ási með Hallgrími) alveg þangað til að hún varð svo unglingaveik að mamma og pabbi ákváðu að við þyrftum stærri íbúð þar sem Nína (og Hallgrímur) fengju sérherbergi. Reyndar svaf amma Malla inni hjá mér þegar hún bjó hjá okkur. Ég hef ekki hugmynd um hvar Nína var á meðan.

 

Pabbi vann hjá Vegagerðinni við að hanna brýr og seinna sem Vegamálastjóri.  Það þýddi að við ferðuðumst mjööög mikið um landið á sumrin og stoppuðum við hverja einustu brú til að kíkja undir hana og athuga ástandið á henni.  Við fórum því ekki hratt yfir en þetta þýddi að við Ási fórum að hafa mikinn áhuga á að kasta einhverju út í straumvatn. Það voru steinar á þessum árum en það þróaðist út í flugur. Ég er forfallinn veiðisjúklingur og hef gert tvær myndir um veiði og tvær sjónvarpsséríur með Ása bró. Sú þriðja verður sýnd á RÚV í vor.

 

Ástæðan fyrir því að ég skrifa bækur er einföld. Ég las Jón Odd og Jón Bjarna þegar ég var 8 ára og heimurinn breyttist. Þarna var komin bók um mig og Ása. Mig langaði að skrifa svona bók!

 

Ástæðan er hinsvegar flókin líka. Ég ólst upp við það að hámarkið, loka-takmarkið, hápunkturinn og það allra flottasta í lífinu væri að vera listamaður. Málari eða skáld var mest töff.  Ég ætlaði aldrei að verða það enda fannst manni listamenn vera galdramenn og álíka líklegt að maður gæti orðið svoleiðis eins og að maður gæti orðið Harry Potter. Svo varð ég stór og núna finnst mér ég soldið góður í því og maður á að reyna að að gera það sem maður er góður í. Kannski er ég bara orðinn galdramaður.

 

Hinsvegar skrifaði ég mína fyrstu bók í 8. bekk. Það er að segja, ég átti að skrifa ritgerð eða sögu og  endaði á því að fylla heila stílabók, spjaldanna á milli með sögu um innflytjendur til Ameríku og indjána og vonda karla og það allt. Guðni íslenskukennari var mjög ánægður með afraksturinn og las alla bókina fyrir bekkinn. Það tók heila viku. Mjög erfiða viku fyrir mig en að lestrinum loknum sagði Guðni að ég ætti að gera meira af þessu. Sem ég gerði ekki. Fyrr en í menntaskóla. Þar hitti ég annan kennara sem hvatti mig ákveðið áfram. Það var hann Brynjúlfur. Hann gaf mér reyndar bara 6,0 fyrir smásögu sem var hluti af  lokaeinkunn sem var alveg glatað því ég hafði skrifað sögur fyrir tvo vini mína sem fengu 8,5 og 9,0 fyrir „sínar” sögur. Ég fékk að skrifa aðra sögu og fékk 8,5 fyrir hana.  Ég hafði ætlað að vera svona rosalega djúpur og gáfaður í fyrstu sögunni minni að það skildi hana ekki nokkur maður „þó að stíllinn væri nokkuð góður” eins og Brynjúlfur sagði.

 

Ég var hálfbeygður eftir þetta en náði mér á strik mánuði síðar, því á stúdentsprófinu sjálfu fékk ég nokkur söguefni til að skrifa. Ég valdi „glæpur og refsing” og skrifaði barnasögu. Prófdómararnir gáfu henni 9,5 og það fylgdi með að hún hefði átt að fá 10.0 en það tíðkaðist bara ekki að gefa smásögum 10,0.

 

Þannig að ég fékk það svona smám saman staðfest að ég gæti skrifað.

 

Strax eftir útskrift úr leiklistarskólanum skrifaði ég Gogga og Grjóna. Ég vann sem næturvörður þetta sumar í þjónustuhúsi fyrir aldraða – þar sem amma bjó – og eftir að hafa farið kaffirúntinn til nokkurrra vina minna og fengið pönnukökur hjá ömmu settist ég niður og handskrifaði fyrstu bókina.  Hún kom út tveimur árum síðar og fékk afbragðsdóma og seldist bara vel. Svo skrifaði ég aðra bók um þá félaga en varð svo mjög upptekinn af því að vera leikari. Skrifaði reyndar Grýlu en var að öðru leyti mest í því að leika og leikstýra. Það var svo árið 2008 að ég byrjaði að vinna hjá Latabæ (sá um leikritin þeirra sem eru sýnd út um allan heim) og þá fann ég hvar ég átti heima. Það var í barnaefninu. Barnabókinni. Ég ákvað árið 2010, þegar ég hætti hjá Latabæ að héðan í frá skyldi ég skrifa eina bók á ári fyrir börn.

 

Það hefur tekist og gengið bara ágætlega.

 

 

 
 

BÆKURNAR MÍNAR!

 

Bækurnar birtast í tímaröð.

Þær nýjustu efst og svo koll af kolli.

A little tiny bit about awards

SMÁ SVONA UM VERÐLAUN

Ég hef fengið pínu pons af verðlaunum fyrir bækurnar mínar. Ég fékk til dæmis Bókaverðlaun barnanna árin ... :
2012 - fyrir Aukaspyrnu á Akureyri
2013 - fyrir Rangstæður í Reykjavík .... og
2015 - fyrir Mömmu klikk!

2016 - fyrir Pabba prófessor!

2017 - fyrir Ömmu best

2018 - fyrir Sigga sítrónu
Og ...
2015 var Mamma klikk! tilnefnd til Vestnorrænu bárnabókaverðlaunanna, Bókaverðlauna starfsfólks bókaverslana og Barnabókaverðlauna Reykjavíkur.
Og svo ... TAMMTAMMTAMMTAAAMMM ... fékk ég hin Íslensku bókmenntaverðlaun árið 2016 fyrir Mömmu klikk! (myndin er sko tekiin þegar ég tók á móti verðlaununum á Bessastöðum) (forsetanum fannst ég ekki alveg nógu virðulegur og ákvað að bjóða sig ekki aftur fram.)

 

 

2019

 

DRAUMAÞJÓFURINN

Í Hafnarlandi er allt eins og það á að vera og rotturnar þekkja sinn sess í lífinu: Safnara safna mat, Njósnarar njósna, Bardagarottur halda óvinum frá og Étarar éta og hafa það gott. Efst í virðingarstiganum er Skögultönn Foringi sem öllu ræður. En daginn sem dóttir hennar, Eyrnastór Aðalbarn Gullfalleg Rottudís, gerir uppreisn gegn starfinu sem henni er úthlutað tekur sagan óvænta stefnu og fer með söguhetjunarnar okkar inn í Borgina þar sem hættur eru á hverju strái og framandi rottur leika lausum hala. Sjálfur DRAUMAÞJÓFURINN er sendur til að bjarga henni - eða til að deyja!

- Draumaþjófurinn gefur fyrri bókum Gunnars ekkert eftir og er þá heldur dregið úr. ***** Morgunblaðið.

Myndirnar gerði Linda Ólafsdóttir.


 

2019

 

BARIST Í BARCELONA

Fótboltasagan mikla ... snýr aftur!

La Masia. Laaa Maaasiaaa. Öðru nafni Himnaríki. Við vorum komnir þangað. Í Himnaríki. Himnaríki í Barcelona ætti þessi bók að heita. Og hún hefði heitið það ef … æ, skiptir ekki máli. Þið skiljið hvað ég á við þegar þið eruð búin að lesa alla bókina.

 

Heilt ár er liðið síðan vinirnir úr Þrótti voru á Gothia Cup-mótinu þegar allt fór í vitleysu og Jón var skotinn í öxlina. Eftir það var ekki spilaður mikill fótbolti. En nú er allt komið á fullt aftur og Þróttararnir þrír – Jón, Ívar og Skúli – eru komnir í fótboltaakademíu FCBarcelona. Markmiðin eru einföld: fá tilboð um að vera áfram með Barcelona eða komast á samning hjá öðru stórliði. Ekki spillir að Rósa er að keppa með U16 landsliðinu í Barcelona á sama tíma ásamt fleiri frábærum fótboltastelpum. Lífið gæti ekki verið fullkomnara – ja, ef ekki væri fyrir þennan dularfulla Katalóna og leyndarmálið sem Jón þarf að burðast með.  

- Það er meira um fótboltabækurnar hérna aðeins neðar :)

2018 ​

 

ÍSLAND Á HM

Gunnar Helgason hefur verið forfallinn aðdáandi landsliðanna okkar í fótbolta síðan hann sá sinn fyrsta landsleik níu ára gamall. Hann get ekki beðið eftir því að HM í Rússlandi byrjaðui og þess vegna skrifaði hann þessa bók - til að stytt abiðina fyrir SIG og ÞIG! Hér eru viðtöl við landsliðsmenn og allskonar skemmtielgt efni um HM í fortíð og nútíð; óvænt úrlsit, sögulegir leikir og leið Íslands á HM 2018.

Síðast en ekki síst geymir bókin viðbótarkafla við FÓTBOLTASÖGUNA MIKLU sem kom út í fjórum metsölubókum: Víti í Vestmannaeyjum, Aukaspyrna á Akureyri, Rangstæður í Reykjavík og Gulaspjaldið í Gautaborg. Hvað ætli Jón Jónsson sé að gera núna?

 

 

STELLUBÆKURNAR

Myndir í öllum Stellubókunum eru eftir Rán Flygenring

 2017

 

AMMA BEST

Kæri lesandi! Stella hér! Ef þú hefur lesið Mömmu klikk, Pabba prófessor og Strákaklefann veistu hver ég er. En þú getur ekki ímyndað þér hvað gekk á vikurnar áður en ég fermdist. Það var svo rosalegt að ég varð að skrifa nýja bók. Ég vil ekki segja of mikið en hér kemur við sögu keppni upp á líf og dauða, líka sjálfur DAUÐINN (ég er ekki að grínast!!) og loks amma Köben - amma best. Góða skemmtun! Kveðja, Stella (spellifandi).

-Amma best var mest selda barnabók ársins 2017 og þriðja mest selda bók landsins.

- Amma best hlaut Bókaverðlaun barnanna árið 2017

ÓKEI, þetta er bara stutt bók um mig, STELLU og svolítið hræðilegt sem gerðist. Í strákaklefanum. Auðvitað átti ég ekkert að vera þar ... og ekki Júdita heldur en það var ekki okkur að kenna. Strákar eru algjörir!!!STRÁKAKLEFINN var skrifuð fyrir Menntamálastofnun.

 

Myndirnar í þessa bók gerði Guðný Hannesdóttir.
 

2016 - PABBI PRÓFESSOR!

KÆRI LESANDI. Hér er komin önnur bók um mig, Stellu (manstu þessa sem átti klikkuðu mömmuna). Sagan gerist á jólunum - sem ég ELSKA - en nú stefnir allt í vitleysu. Á ísskápnum hangir langur listi yfir allt sem þarf að gera og verkstjórinn er enginn annar en PABBI PRÓFESSOR. Það er ekki séns að þetta náist! Svo er hitt. ALLIR eru allt í einu orðnir skotnir í einhverjum ... nema ég. Hver vill líka stelpu í ... æ þú veist? Það er samt einn strákur ... þú verður bara að lesa bókina ef þú vilt vita meira. KVEÐJA,STELLA!

- Pabbi Prófeóssor var mest selda barnabók ársins 2016 og þriðja mest selda bók landsins.

- Pabbi prófessor vann Bóakverðlaun abrnanna árið 2016

2015 - MAMMA KLIKK!

Heldurðu að þú eigir klikkaða mömmu? Bíddu þangað til þú lest um mína! Einu sinni var hún skemmtielg og frábær og fjörug en upp á síðkastið hefur hún snarversnað. Það finnst það ÖLLUM! En engar áhyggjur, ég er með áætlun. ÁÆTLUN: BREYTUM MÖMMU!
- Mamma klikk! var tilnefnd til Vestnorrænu barnabókaverðlaunanna og til Bókaverðlauna starfsfólks bókaverslana árið 2015
- Mamma klikk! hlaut Bókaverðlaun barnanna og Íslensku bókmenntaverðlaunin árið 2015

- Mamma klikk! var keypt til uppsetningar í Þjóðleikhúsinu
- Mamma klikk! verður vonandi að kvikmynd á næstunni.

- Mamma klikk! var mest selda barnabók ársins 2015 og þriðja mest selda bók landsins.

- Mamma klikk! kom út í Danmörku í ágúst 2017 undir heitinu Sköre mor!

- Mamma klikk! kemur út í Makedóní og Suður-Kóreu á árinu 2019

- Mamma klikk! LEIKRITIÐ var frumsýnt 19. oktober 2019 í Gaflaraleikhúsinu og sló öll met!

Korea

Denmark

2018

 

SIGGI SÍTRÓNA

Kæri lesandi, þetta er ég aftur, Stella, þessi sem dó næstum úr skömm í Mömmu klikk, bjargaði jólunum í Pabba prófessor og dó næstum í alvörunni í Ömmu best– svona í stuttu máli. Miðað við það gerist nú ekki mikið í þessari bók – DJÓK – það er ekkert grín hvað það gengur mikið á í kringum mig. Lestu bara og sjáðu!

Kveðja,

Stella

- Siggi sítróna var mest selda barnabók landsins árið 2018 og í fjórða sæti yfri mest seldu bækur landsins

 

-  Siggi sítróna hlaut Bókverðlaun barnanna árið 2018

 

HVAÐ SÖGÐU GAGNRÝNENDUR?

Gunnar Helgason nýtir bókarformið fullkomlega og kemur aftan að lesendum sínum, þótt þá reyndustu gruni fljótlega að ekki sé allt uppi á borðum.Frásögnin er leikandi, brjálæðislega fyndin og grípur lesandann heljartökum svo honum reynist erfitt að leggja bókina frá sér. Persónur eru marghliða, vel skapaðar og auðvelt að þykja vænt um þær allar – hverja eina og einustu. Umfjöllunarefnið og sjónarhornið er frumlegt, verðugt og framkvæmt af leikandi snilld. Niðurstaða: Algjörlega – og óumræðilega – frábær saga sem fjallar um verðug málefni frá gelgjulegu sjónarhorni. Það er erfitt að leggja þessa fallegu og fyndnu bók frá sér.

Barnabók ársins 2015!
 

Morgunblaðið

​Víðsjá - RÚV Radio 1

Eitt af því sem gerir barnabækur Gunnars Helgasonar jafngóðar og frískandi og raun ber vitni er að honum virðist fyrst og fremst vera umhugað um hvort að lesendur bókanna, börn og unglingar, muni hafa gaman af þeim. Hann setur fyndnina í forgang en nær að fjalla af alúð um ólíka hópa í samfélaginu. Það er hressandi að sjá slíkar bækur verða að föstum lið í bókaflóði barnanna og án efa margir aðdáendur sem bíða spenntir eftir að fá Pabba professor í jólagjöf og óska ég þeim heppnu lesendum gleðilegra hláturskasta og bókajóla. 

AMMA BEST

Lesandi getur hreinlega átt á hættu að fá harðsperrur í brosvöðvana við lesturinn. 

SIGGI SÍTRÓNA

bokmenntaborgin.is

 Gleðin og gamansemin, ásamt einlægni Sigga og áhyggjum hans af framtíðinni, gera söguna að afar vel heppnaðri blöndu af gleði og alvöru.

María Bjarkadóttir, 2018

 

Þetta var rosalegt!

MAMMA KLIKK!

sirkustjaldid.is

Mamma klikk er stórkostleg barnabók, frábærlega vel skrifuð, skemmtileg, bráðfyndin og yndisleg. Hún er afbragðs tækifæri fyrir foreldra til þess að lesa fyrir börnin sín eða láta þau jafnvel lesa fyrir sig, því enginn ætti að missa af þessari bók, hvorki barn né fullorðinn. Ég óska Gunnari Helgasyni og Forlaginu innilega til hamingju með hana.
 

Fréttablaðið

PABBI PRÓFESSOR!

Vikan 

Þetta er bráðskemmtileg barna- og unglingabók og stendur fyrri bókinni um Stellu, Mamma klikk, ekkert að baki. Sú bók fékk Íslensku bókmenntaverðlaunin í flokki barnabóka.

Pabbi professor er ekki bara fyndin og skemmtileg bók, heldur er í henni fólginn fallegur boðskapur. Höfundur hefur þennan x-faktor, neistann sem sem þarf til að geta skemmt lesendum. Maður hlær upphátt, tárast örlítið og skemmtir sér konunglega allan tímann.

 

bokmenntir.is

 

Sambönd og samskipti innan fjölskyldunnar allrar eru mjög sannfærandi og aðstæður og atvik sem koma upp kunnugleg á margan hátt. Stella sem persóna er afskaplega vel mótuð, hún er mótsagnakennd eins og fólk er flest og tilfinningar hennar sveiflast frá gleði til uppgjafar eftir því hvernig aðstæður eru hverju sinni

Stella þarf að endurskoða sjálfsmynd sína og takast á við bæði sjálfa sig og nýja kunningja í unglingadeildinni áður en hún kemst að niðurstöðu um það hver hún er og hver hún vill vera.

Tónninn er léttur og textinn fullur af húmor og lífsgleði; skemmtilegur lestur sem vekur til umhugsunar um líf annarra með því að draga fram það sem er kunnuglegt og sýna það í nýju ljósi.

 

Morgunblaðið

Barnabók ársins 2016!

FÓTBOLTASAGAN MIKLA

 

Myndirnar í öllum fótboltabókunum eru eftir Rán Flygenring

2011 - VÍTI Í VESTMANNAEYJUM

VÍTI Í VESTMANNAEYJUM er fyrsta bókin af fjórum um Jón Jónsson, Skúla, Ívar og Rósu. Jón og Skúli fara að keppa í Vestmannaeyjum og kynnast Ívari, heimamanni sem á í hrikalegum vandræðum með pabba sinn. Því þurfa Jón og félagar að taka á honum stóra sínum og vaxa sem knattspyrnumenn og manneskjur ef þau ætla að koma Ívari til hjálpar.


- Kvikmyndin Víti i Vestmannaeyjum kom í bíó um páska 2018 og sjónvarpsþættirnir í ágíúst sama ár.

 

- Vorið 2020 kom Víti í Vestmannaeyjum út á pólsku, bæði sem rafbók og hljóðbók. Þýðandi er Jacek Godek og lesari er Paweł Ciołkosz. Útgáfan er hugsuð fyrir pólskumælandi börn á íslandi en aldrei er að vita nema bókin komi síðar út í Póllandi.

 

 Myndirnar í allar fótboltabækurnar gerði Rán Flygenring
 

2012 - AUKASPYRNA Á AKUREYRI

 


Á AKUREYRI kynnist Jón ekki bara nýrri hlið á Ívari heldur á sér og pabba Ívars líka ... og svo kynnist hann Rósu! (hann er samt EKKI skotinn í henni!) Baráttan heldur áfram innan vallar sem utan og það er allt í einu ekki alveg á hreinu hver vondi karlinn í sögunni hans Jóns er. Er það kannski hann sjálfur? Og bara eitt að lokum: VARÚÐ! Vasaklútaendir (þó að þú sért búinn að hlæja eða naga neglurnar af spennnu alla bókina)!

- Aukaspyrnan var mest selda barnabók landsins árið 2012.

 

- Aukaspyrnan hlaut Bókaverðlaun barnanna árið 2012. 

2013 - RANGSTÆÐUR Í REYKJAVÍK

Úps! Stelpur spila líka á þessu móti. Rósa er mætt og hormónarnir flæða um allt og fara alveg með Jón.

Pabbi Ívars er kominn á botninn og dregur einn af vinum sínum úr ræsinu inn í fótboltaheiminn. Jón, Skúli, Rósa og allir hinir krakkarnir þurfa að berjast gegn svindlinu hans sem og fóstur-bróður Ívars. Spennan er óbærileg innan vallar sem utan og krakkarnir uppgötva að þau geta líka verið rangstæð í lífinu sjálfu.

Lokaleikurinn fer fram á götunni og þar er spilað um líf Ívars, hvorki meira né minna. 

- Rangstæður var mest selda barnabók landsins árið 2013 og í níunda sæti yfir allar bækur. 

- Rangstæður hlaut Bókaverðlaun barnanna árið 2013.

2014 - GULA SPJALDIÐ Í GAUTABORG

Krakkarnir fara til Gautaborgar til að keppa á stærsta fótboltamóti í heimi. Hér snýst allt um þetta: Þau verða að losna við pabba hans Ívars, koma honum út úr lífi Ívars. En þau verða líka að vinna mótið. OG Jón þarf að vinna Rósau til baka. OG hann þarf að koma í veg fyrir að þjálfarinn deyi (hann dreymdi að hann yrði skotinn, sko).

Getur hann gert allt þetta? Eða mun hann sjálfur deyja? Er það virkilega mögulegt að pabbi Ívars geti orðið góði gæjinn í sögunni? Getur það einhver? Getur Jón það?

VARÚÐ: Ekki hætta að lesa! Ekki einu sinni þegar það kemur:  ENDIR

Hér lýkur fótboltasögunni miklu!

Eða sko ... hér átti henni að ljúka. Barist í Barcelona kom út árið 2019 eins og sjá má hér ofar. 

- Gula spjaldið var mest selda barnabók ársins 2014 og sú fjórða mest selda í öllum flokkum. Hún seldist í helmingi stærra upplagi en Rangstæður í Reykjavík.

 
 
 

HVAÐ SÖGÐU GAGNRÝNENDUR

Víti

* * * *
„Hér er einfaldlega hörkufín barnabók sem á erindi til allra krakka, og það sem meira er, fullorðnum mun ekki leiðast að lesa hana fyrir ungviðið.“

JAÓ / Morgunblaðið


* * * *
„Persónusköpun klár og málið lifandi og eðlilegt. Fín bók fyrir stráka hef ég reynt á einum níu ára sem segir þetta spennandi stöff.“

PBB / Fréttatíminn

Aukaspyrnan

****
„Höfundur kann einfaldlega að búa til grípandi frásögn sem heldur vel og hreinlega togar lesandann áfram … Bókin er í stuttu máli sagt jafn ljómandi vel heppnuð og Víti í Vestmannaeyjum og stefnir í að boltabækurnar um Þróttarann Jón Jónsson komi sér fyrir á klassísku hillunni fyrir íslenskar barna- og unglingabækur.“

Jón Agnar Ólason / Morgunblaðið

„Ef þér líkaði Víti í Vestmannaeyjum þá á þér pottþétt eftir að líka Aukaspyrna á Akureyri. Jón Jónsson að verða unglingur. Það er bara fátt fyndnara en það!"

Katrín Jónsdóttir -  fyrirliði kvennalandsliðsins í fótbolta 

2010

 

 NORNIN OG DULARFULLA GAUKSKLUKKAN

Múr byggður á milli tveggja ríkja. Hverjum dettur slíkt í hug?

 

Í konungsríki nokkru eru allir ánægðir og glaðir nema konungshjónin sem geta ekki eignast barn. Dag einn kemur ægifögur kona til hallarinnar með dularfulla gauksklukku í fanginu. Hún gefur kóngi og drottningu klukkuna með þeim orðum að þegar gaukurinn gali í fyrsta sinn muni þau eiga barn í vændum. En gaukurinn á eftir að gala oftar og það boðar ekki alltaf gleðitíðindi.

 

Ég skrifaði þessa bók með BJörgvin Franz Gíslasyni sem baksögu fyrir Stundina okkar.

 

Myndirnar gerði Halldór Baldursson​
 

 

1997

 

 GRÝLA

Grýla segir hér frá baráttu sinni við jólasveinana þegar þeir vilja vera hreinir og stroknir og …GÓÐIR!!! Ekki nóg með það heldur á Grýla tugi annarra barna og tvö fyrrverandi eigin-tröll. Og þegar þeir mæta í jólaboðið fer allt í hund og kött … eða hest og bola!

 

Myndirnar gerði Þórarinn Blöndal.

 

1995

 

GOGGI OG GRJÓNI - VEL Í SVEIT SETTIR

Goggi og Grjóni eru sendir í sveit til ættingja Grjóna. Ævintýrin láta ekki standa á sér fremur en fyrri daginn. Strákarnir eru allir af vilja gerðir til að verða að liði við sveitastörfin, en það eru ekki allir jafn sáttir við þá hjálp.

 

Myndirnar gerði Hallgrímur Helgason, bróðir minn. 
 

Goggi og Grjóni eru 8 ára og bestu vinir sem eiga heima í sömu blokk. Þeir eru að uppgötva heiminn og sitt nærumhverfi. Chaplin, fúli strætóbólstjórinn, Begga, Begga hin, Begga stora, pabbi lögga, afi og kolkrabba-þvottavélin gefa þeim ýmislegt að hugsa um og þeir gera ýmislegt sem þeir hefðu kannski betur látið ógert!

Myndirnar gerði Hallgrímur Helgason, bróðir minn. 

1992

 

 GOGGI OG GRJÓNI

Rangstæður

*****
„Sagan ner einmitt í hröðum takti og æsingurinn kallast hressilega á við hormónaglæði aldursskeiðsins sem um er rætt … Hress, einlæg og bráðfyndin unglingabók. Fær lesendur til að hlæja en einnig til að velta fyrir sér alvörumálefnum.“
Halla Þórlaug Óskarsdóttir / Fréttablaðið



*****
„Fótboltabækurnar þrjár eftir Gunnar Helgason eru glæsilegt „hatt-trikk“ svo mállýska úr sportinu sé notuð, og það er til marks um hversu vel lukkast hér sem fyrr að 11 ára fótboltapeyi og pabbi hans voru jafnspenntir að klára þessa bók. Hún er framúrskarandi fín.“


Jón Agnar Ólafsson – MorgunblaðiÐ

Gula spjaldið

* * * *
„Bókin er, eins og fyrri bækurnar, brjálæðislega hress. Og bókin er mjög fyndin. Ég hló oft upphátt og það er ein sena í bókinni sem ég las upphátt fyrir alla sem vildu heyra. Og hló meðan ég las. Gunnar Helgason fjallar í bókunum um alvarleg málefni í bland við hversdagsleikann, bara eins og í lífinu, og það er vel gert … Stórskemmtileg og spennandi bók, sem tekur á stórum, mikilvægum málefnum í bland við smærri. Bók fyrir stráka og stelpur. Og gamlar frænkur.“
Halla Þórlaug Óskarsdóttir / Fréttablaðið


 

 
 

VIÐ GERÐUM KVIKMYND!

THE REAL TOURNAMENT

THE ACTUAL VOLCANO

THE AUTHENTIC PASSION

THE REAL DANGER

HAFÐU SAMBAND 

Takk fyrir að tjekka á síðunni minni. Ef þú hefur einhverjar spurningar ekki hika við að senda mér línu. Ókeibæ!
 

Heimilisfang:

Háihvammur 1, 220 Hafnarfjörður, Iceland

netfang:

Sími:

8240882

  • facebook
  • facebook
  • generic-social-link

+354 8240882

Háihvammur 1,  220 Hafnarfjörður, Iceland

  • facebook
  • facebook
  • generic-social-link

©2016 by Gunnar Helgason. Proudly created with Wix.com

 
 
Mark03-MarkEivarar.jpg